ભાગ ૪૨: ભાઉરાવના મેઈન અડ્ડા પર આરવની રેડ
અમદાવાદ શહેરની બહાર, નારોલ ઇન્ડસ્ટ્રીયલ એરિયાનો છેવાડાનો વિસ્તાર.
અહીં એક જૂની, વર્ષોથી બંધ પડેલી ટેક્સટાઈલ મિલ હતી. બહારથી આ જગ્યા ખંડેર લાગતી હતી, પણ અંદરથી આ અંડરવર્લ્ડ ડોન ભાઉરાવનો મેઈન અડ્ડો હતો. મિલની ચારે બાજુ દસ-દસ ફૂટ ઊંચી દીવાલો હતી, જેના પર કાચના ટુકડા અને કાંટાળી તાર લગાવેલી હતી. મેઈન ગેટ પર એકે-૪૭ (AK-47) લઈને બે પહેરેદારો ઊભા હતા અને આખા કમ્પાઉન્ડમાં હાઈ-ડેફિનેશન સીસીટીવી કેમેરા ફરતા હતા.
અહીં કોઈ પોલીસ કે તપાસ એજન્સી પણ ડાયરેક્ટ રેડ પાડતા પહેલા સો વાર વિચાર કરે!
પણ મિલની પાછળની અંધારી ગલીમાં, એક કાળો પડછાયો શિકાર માટે તૈયાર હતો. આરવ!
આજે એણે સામાન્ય શર્ટ-પેન્ટ નહોતા પહેર્યા. એના શરીર પર RAW નો અત્યાધુનિક, બ્લેક કલરનો સ્ટીલ્થ ટેક્ટિકલ સૂટ (Stealth Tactical Suit) હતો. એની કમર પર મેટલની પિસ્તોલ, સ્મોક ગ્રેનેડ અને પીઠ પર એક પાતળું પણ અત્યંત મજબૂત કાર્બન-ફાઈબરનું દોરડું હતું.
આરવે પોતાની સ્માર્ટવોચ પર થોડા કમાન્ડ્સ ટાઈપ કર્યા.
“ફેલ્કન સર, કેમેરા સિસ્ટમ હેક કરો.”
માત્ર પાંચ સેકન્ડમાં જ મિલના તમામ કેમેરાઓની સિસ્ટમ લૂપ (Loop) માં જતી રહી. એટલે કે અંદર બેઠેલા ગાર્ડ્સને સ્ક્રીન પર બધું નોર્મલ જ દેખાઈ રહ્યું હતું, પણ વાસ્તવમાં રેકોર્ડિંગ પોઝ થઈ ગયું હતું!
આરવે પોતાના હાથમાં મેગ્નેટિક ગ્લોવ્ઝ (ચુંબકીય હાથમોજાં) પહેર્યા અને કોઈ ગરોળીની જેમ ૯૦ ડિગ્રી સીધી લોખંડની દીવાલ પર સડસડાટ ચઢવા લાગ્યો. 'મિશન ઈમ્પોસિબલ' ના કોઈ એજન્ટની જેમ, એ ૬૦ ફૂટ ઊંચી છત પર પહોંચી ગયો.
છત પર એક મોટી કાચની સ્કાયલાઈટ (Skylight) હતી. આરવે પોતાના બેલ્ટમાંથી એક નાનકડી લેસર-પેન કાઢી અને બિલકુલ અવાજ કર્યા વગર કાચને ગોળાકારમાં કાપી લીધો.
નીચે નજર કરતા જ આરવનું લોહી ઊકળી ઉઠ્યું.
ગોડાઉનની બરાબર વચ્ચે એક મોટું ટેબલ હતું. ટેબલ પર દારૂની બોટલો અને નોટોના બંડલ પડ્યા હતા. એક વિશાળ ખુરશી પર ભાઉરાવ બેઠો હતો, અને એની આસપાસ વીસેક જેટલા ખડતલ, હથિયારબંધ ગુંડાઓ ઊભા હતા.
"પેલા બંને શૂટર્સનો હજુ કોઈ ફોન કેમ નથી આવ્યો?" ભાઉરાવ ગુસ્સામાં સિગારના કશ ખેંચતા બરાડી રહ્યો હતો. "મેં એમને પેલી આધ્યાના માથામાં ગોળી મારવાનું કહ્યું હતું! જો પેલો આરવ આપણું ડ્રગ્સ પકડાવી શકતો હોય, તો આપણે એની પ્રેમિકાને..."
ભાઉરાવનું વાક્ય પૂરું થાય એ પહેલાં જ... ખટાક!
ગોડાઉનની મેઈન પાવર સપ્લાય અચાનક બંધ થઈ ગઈ! આખા ખંડેરમાં ઘોર અંધકાર છવાઈ ગયો!
"કોણે લાઈટ બંધ કરી? જનરેટર ચાલુ કરો જલ્દી!" ભાઉરાવ ડરથી બરાડ્યો.
ગુંડાઓએ પોતાના મોબાઈલની ફ્લેશલાઈટ અને બંદૂકો તાકી. પણ એમને ખબર નહોતી કે એમનો સામનો કોઈ માણસ સાથે નહિ, પણ અંધારાના બાદશાહ સાથે થઈ રહ્યો છે.
આરવે છત પરથી પોતાનું દોરડું નીચે ફેંક્યું અને એક હળવો કૂદકો માર્યો. હવામાં ૪૦ ફૂટ નીચે સરકીને એ કોઈ પણ અવાજ વગર જમીન પર લેન્ડ થયો. એની આંખો પર અત્યાધુનિક નાઈટ-વિઝન ગોગલ્સ (Night-Vision Goggles) હતા, જેમાં એને અંધારામાં પણ બધું લીલા રંગમાં સ્પષ્ટ દેખાઈ રહ્યું હતું.
શિકાર શરૂ થઈ ચૂક્યો હતો!
એક ગાર્ડ અંધારામાં મોબાઈલની લાઈટ કરતો આગળ વધ્યો.
અચાનક જ અંધારામાંથી એક લોખંડી હાથ બહાર આવ્યો. આરવે એ ગાર્ડનું કાંડું પકડીને એને હવામાં એવી રીતે ગોળ ફેરવીને જમીન પર પછાડ્યો કે એના મોંમાંથી ચીસ નીકળે એ પહેલાં જ એ બેભાન થઈ ગયો.
થડ્ડ!
બીજો અવાજ આવ્યો.
કડડડ! હાડકું તૂટવાનો અવાજ!
ભાઉરાવના ગુંડાઓ અંધાધૂંધ ફાયરિંગ કરવા લાગ્યા, પણ એમની ગોળીઓ માત્ર હવાને વીંધી રહી હતી. આરવ વીજળીની ગતિથી એક જગ્યાએથી બીજી જગ્યાએ મૂવ કરી રહ્યો હતો. એણે બંદૂકનો ઉપયોગ કરવાની જરૂર જ નહોતી. RAW ની અત્યંત ઘાતક ક્રેવ-માગા (Krav Maga) માર્શલ આર્ટ્સનો ઉપયોગ કરીને, એ માત્ર અમુક સેકન્ડોમાં જ ગુંડાઓના અતિ-સંવેદનશીલ પોઈન્ટ્સ પર પ્રહાર કરી રહ્યો હતો.
કોઈના ઘૂંટણ તૂટી રહ્યા હતા, કોઈના ખભા ડિસલોકેટ થઈ રહ્યા હતા.
માત્ર બે મિનિટ... માત્ર બે મિનિટના સમયમાં પંદર જેટલા ખડતલ ગુંડાઓ જમીન પર કણસી રહ્યા હતા!
અને ત્યારે જ... ભડ્ડ! અવાજ સાથે બેકઅપ જનરેટર ચાલુ થયું અને ગોડાઉનની લાઈટ્સ પાછી આવી ગઈ.
ભાઉરાવ અને બચેલા પાંચ ગુંડાઓએ આંખો ચોળીને જોયું, તો એમના હોશ ઉડી ગયા! આખું ગોડાઉન કોઈ સ્મશાન જેવું ભયાનક લાગી રહ્યું હતું. એમના બેસ્ટ માણસો જમીન પર કચડાયેલા પડ્યા હતા.
અને બરાબર ભાઉરાવની ખુરશીની સામે, માત્ર દસ ફૂટના અંતરે...
કેપ્ટન આરવ સિંહ બંને હાથ ખિસ્સામાં નાખીને અત્યંત અડગ, શાંત અને સિંહ જેવી ખુમારી સાથે ઊભો હતો! એના ચહેરા પર ડરનો એક છાંટો પણ નહોતો, માત્ર એક કાતિલ ક્રોધ હતો.
ભાઉરાવના પગ ધ્રૂજી ગયા. એને પરસેવો વળી ગયો. આ માણસ કોઈ સામાન્ય સ્ટુડન્ટ નહોતો, આ સાક્ષાત કાળ હતો!
"તેં મારી આધ્યા પર નિશાન તાકવાની બહુ મોટી ભૂલ કરી છે ભાઉરાવ..." આરવનો અવાજ આખા ગોડાઉનમાં પડઘા પાડી રહ્યો હતો. એમાં કોઈ બૂમાબૂમ નહોતી, પણ મોતની શાંતિ હતી. "મેં તારા શૂટરને કહ્યું હતું કે હું આખા અડ્ડાને સ્મશાન બનાવી દઈશ. આજે હું તારા અહંકાર, તારી ગેંગ અને તારા અસ્તિત્વની કબર અહીં જ ખોદી નાખીશ."
ભાઉરાવના બચેલા પાંચેય ગુંડાઓએ એકસાથે આરવ પર બંદૂકો તાકી!
પણ આરવે પોતાની જગ્યાએથી સહેજ પણ હલ્યા વગર, આંખોમાં આગ ભરીને પોતાના બંને હાથ ખિસ્સામાંથી બહાર કાઢ્યા.
હવે કોઈ હાઈ-ટેક ગેજેટ્સ નહિ... હવે માત્ર પ્યોર, ખતરનાક અને ભયાનક હેન્ડ-ટુ-હેન્ડ કોમ્બેટ (Hand-to-Hand Combat) નો સમય હતો!
(ક્રમશ:)
“નીલ”
ડૉ. નિલેષ ઠાકોર
