અંધારી રાત, ધોધમાર વરસાદ અને અમદાવાદના આઉટર રિંગ રોડ પર ૧૨૦ ની સ્પીડે દોડતી એક બ્લેક એસયુવી (SUV). ગાડીની પાછળ પોલીસની બે પીસીઆર વાન સાઇરન વગાડતી પીછો કરી રહી હતી. અચાનક, એસયુવીની બ્રેક વાગી. ટાયરોના ચીત્કાર સાથે ગાડી રોડની સાઈડમાં ઊભી રહી ગઈ. પોલીસ વાનમાંથી ચાર હથિયારધારી કોન્સ્ટેબલ બહાર આવ્યા અને એસયુવીને ઘેરી લીધી. પણ તેઓ કંઈ સમજે તે પહેલાં જ એસયુવીનો દરવાજો ખૂલ્યો અને અંદરથી એક છોકરી બહાર ફેંકાઈ. તેના કપડાં લોહીથી લથપથ હતાં, પેટ પર સર્જરીના ટાંકા હતા અને આંખોમાં અજીબ ભય હતો. "મને બચાવો... તે લોકો મારા બાળકને... લેબમાં રક્તબીજ..." એ છોકરી આટલું બોલીને બેભાન થઈ ગઈ. પોલીસ સ્ટાફ કંઈ સમજી ન શક્યો, પણ ગાડીની ડ્રાઈવિંગ સીટ પર બેઠેલી વ્યક્તિએ સ્પીડ વધારી અને અંધારામાં ગાયબ થઈ ગઈ. આ છોકરી બીજું કોઈ નહીં, પણ શહેરની જાણીતી મોડેલ 'પ્રિયા' હતી, જે છેલ્લા ત્રણ મહિનાથી ગુમ હતી.
આ હાઈ-પ્રોફાઈલ અને રહસ્યમય કેસ સોંપાયો સેન્ટ્રલ બ્યુરો ઓફ ઇન્વેસ્ટિગેશન (CBI) ની મેડિકલ ક્રાઈમ વિંગની સૌથી તેઝતરાર અંડરકવર ઓફિસર નવ્યા ને.
નવ્યા અને Dysp રોહન સાથે મળીને બાતમીદારો પાસેથી ઇનમ્ફર્મેશન મેળવી માસ્ટર પ્લાન બનાવ્યો. તેમને જે ઇનમ્ફર્મેશન મળી તેમાં દેશના મોટા રાજકારણી, ઉદ્યોગપતિ અને માફિયા ભેગા મળીને આ હોસ્પિટલ માં કોઈ મોટુ પ્લાન કરી રહ્યા છે.
નવ્યાએ તપાસ શરૂ કરી તો પ્રિયાના મેડિકલ રિપોર્ટ્સમાંથી એક ચોંકાવનારી કડી મળી—'આયુષ આઈ.વી.એફ. (IVF) સેન્ટર'. પ્રિયા અનમેરીડ હતી તો તે આઈ.વી.એફ. સેન્ટર માં કેમ ગઇ હશે ને તેની સાથે શું થયું હશે તે રહસ્ય હતું.
આ કોઈ સામાન્ય હોસ્પિટલ નહોતી, પણ દેશ-વિદેશના અમીરો માટે 'ટેસ્ટ ટ્યુબ બેબી' અને ફર્ટિલિટી ટ્રીટમેન્ટ આપતું હાઈ-ટેક સેન્ટર હતું, જેના માલિક ડૉ. સિદ્ધાર્થ અને ડૉ. અંજલિ હતા.
નવ્યા જાણી ચૂકી હતી કે બહારથી આલીશાન દેખાતી આ હોસ્પિટલની અંદર કોઈ કાળો કારોબાર ચાલી રહ્યો છે. સત્ય સુધી પહોંચવા માટે નવ્યાએ એક મોટો ખતરો ઉઠાવ્યો. તેણે પોતાની અસલી ઓળખ છુપાવી, ઇન્સ્પેક્ટર મોહિત સાથે મળીને પતિ પત્ની બનીને ટ્રીટમેન્ટનાં બહાને હોસ્પિટલ અંદર પહોંચવાનો પ્લાન બનાવ્યો.
Dysp રોહન નું કહેવું હતું કે બહારથી તપાસ કરવી અને અંદર જઈ તપાસ કરવી અલગ અને ખતરો છે. નવ્યા આ ખતરો લેવા તૈયાર હતી.
નવ્યા ની મેડિકલ તપાસ માટે દાખલ કરવામાં આવી. કાગળિયા ની વિધિ પુરી કરી મોહિતને ઘરે જવા કહેવાયું. નવ્યા ને બે દિવસ રહીને તપાસ અને ટ્રીટમેન્ટ કરાવાની હતી. મોહિત ક્રાઇમ બ્રાન્ચ પહોંચી હોસ્પિટલ પર જરૂર પડે ટીમ સાથે તૈયારી શરૂ કરી.
હોસ્પિટલના હાઈ-ટેક વાતાવરણમાં નવ્યાની નજર દરેક નાની ગતિવિધિ પર હતી. ટૂંક જ સમયમાં તેને સમજાયું કે હોસ્પિટલના અન્ડરગ્રાઉન્ડ લેવલ-૩ પર જવા માટે માત્ર ડૉ. સિદ્ધાર્થ અને ડૉ. અંજલિના બાયોમેટ્રિક એક્સેસની જ જરૂર પડતી હતી અને ત્યાં પેસેન્ટ કે સામાન્ય સ્ટાફને જવાની સખત મનાઈ હતી.
રાત્રે જ્યારે આખી હોસ્પિટલ સૂતી હતી, ત્યારે નવ્યાએ પોતાની સ્પાય સ્કીલ્સનો ઉપયોગ કરીને ડૉ. સિદ્ધાર્થની કેબિનમાંથી તેમનો ક્લોન કરેલો થમ્બ-ઈમ્પ્રેશન (અંગૂઠાનું નિશાન) મેળવ્યો અને લેવલ-૩ ના લોખંડી દરવાજા ખોલી નાખ્યા. અંદરનું દ્રશ્ય જોઈને નવ્યાના રૂંવાડા ઊભા થઈ ગયા. એ કોઈ હોસ્પિટલ નહોતી, પણ આંતરરાષ્ટ્રીય બાયો-માફિયા 'ધ કાઇમેરા સિન્ડિકેટ' ની ગુપ્ત લેબોરેટરી હતી! તેણે જોયું કે કાચની મોટી-મોટી ટાંકીઓમાં સેંકડો પ્રવાહી ભરેલાં હતાં, જેમાં માનવ ભ્રૂણ (Human Embryos) ને ઉછેરવામાં આવી રહ્યા હતા.
નવ્યાએ ત્યાંના મેઈન સર્વરને હેક કરીને ડેટા જોયો તો પ્રિયાના એ શબ્દનો અસલી અર્થ તેની સામે આવ્યો—"પ્રોજેક્ટ રક્તબીજ". આ માફિયાઓ આઈ.વી.એફ. કરાવવા આવતી માસૂમ સ્ત્રીઓના ગર્ભમાંથી અથવા એગ ડોનર્સના અંડકોષો મેળવીને લેબમાં હજારો ભ્રૂણ તૈયાર કરતા હતા. પૌરાણિક રાક્ષસ રક્તબીજની જેમ, આ ભ્રૂણના લોહી અને સેલ્સ (Cells) માં એવું જીનેટિક મોડિફિકેશન કરવામાં આવ્યું હતું કે તે સેલ્સ માનવ શરીરની બહાર પણ અનંત ગણી ઝડપે મલ્ટીપ્લાય (એકમાંથી હજારો) થઈ શકતા હતા. આ ભ્રૂણને ચોક્કસ અઠવાડિયા સુધી જીવંત રાખી, તેમાંથી અત્યંત શક્તિશાળી 'રક્તબીજ સ્ટેમ સેલ્સ' નીચોવી લેવામાં આવતા હતા. આ સેલ્સ દુનિયાના અબજોપતિઓ અને ગેંગસ્ટર્સને સદા યુવાન રાખવા માટે અને કોઈપણ ક્ષીણ થઈ ગયેલા અંગને ફરી સજીવન કરવા માટે કરોડો ડોલરમાં બ્લેક માર્કેટમાં વેચાતા હતા. જે મહિલાઓ આ ભયાનક પ્રયોગ વિશે જાણી જતી, તેમને ગર્ભપાત કરાવીને આ લેબમાં જ મારી નાખવામાં આવતી હતી.
"બહુ સરસ નવ્યા... અથવા એમ કહું કે CBI ઓફિસર નવ્યા!" અચાનક પાછળથી તાળીઓનો અવાજ આવ્યો. નવ્યાએ ફરીને જોયું તો ડૉ. સિદ્ધાર્થ, ડૉ. અંજલિ અને તેમની પાછળ માફિયાનો ખતરનાક શાર્પશૂટર અને સિક્યુરિટી ચીફ 'રાઘવ' હાથમાં ઓટોમેટિક ગન લઈને ઊભો હતો. નવ્યાની અંડરકવર ઓળખ છતી થઈ ચૂક્યા હતી. ડૉ. અંજલિ ક્રૂરતાથી હસી, "તે પ્રોજેક્ટ રક્તબીજ જોઈ લીધો નવ્યા? જેમ રક્તબીજના લોહીનું એક ટીપું નવો જીવ પેદા કરતું, એમ આ સેલ્સ દુનિયાના અમીરોને ક્યારેય મરવા નહીં દે! પણ અફસોસ, તું આ સત્ય બહાર નહીં લઈ જઈ શકે. રાઘવ, આને એવી મોત આપો કે આનું બોડી પણ ક્યારેય સીબીઆઈને ન મળે."
રાઘવ અને તેના ચાર હથિયારધારી ગુંડાઓ નવ્યા તરફ આગળ વધ્યા. પણ નવ્યા સરેન્ડર કરવાના મૂડમાં નહોતી. તેણે વીજળીની ઝડપે હવામાં કૂદકો માર્યો અને રાઘવના હાથ પર જોરદાર કિક મારી, જેથી તેની ગન દૂર જઈને પડી. નવ્યાએ લેબના સર્જિકલ ટેબલ પર પડેલી કાતર (Scalpel) ઉઠાવી અને એક ગુંડાના ગળા પર વાર કર્યો. લેબમાં જબરદસ્ત હેન્ડ-ટુ-હેન્ડ ફાઇટ શરૂ થઈ ગઈ. નવ્યાએ પોતાની માર્શલ આર્ટ્સ સ્કીલ્સનો ઉપયોગ કરીને બે ગુંડાઓને જમીનદોસ્ત કરી દીધા. પરંતુ રાઘવે પાછળથી આવીને નવ્યાની ગરદન પકડી લીધી, જેથી નવ્યાનો શ્વાસ રૂંધાવા લાગ્યો. બરાબર એ જ સમયે નવ્યાની નજર બાજુમાં રહેલી લિક્વિડ નાઇટ્રોજનની પાઇપ પર પડી. નવ્યાએ પૂરી તાકાત લગાવીને એ પાઇપનો વાલ્વ ખોલી નાખ્યો. માઇનસ ૧૯૬ ડિગ્રી ઠંડું લિક્વિડ નાઇટ્રોજન સીધું રાઘવના ચહેરે ઉડ્યું. રાઘવ દર્દથી ચીસ પાડી ઉઠ્યો અને નવ્યાને છોડી દીધી. તકનો લાભ લઈને નવ્યાએ લેબના કેમિકલ રેકને ધક્કો માર્યો, જેનાથી બે વિસ્ફોટક કેમિકલ મિક્સ થયા અને લેબમાં એક જોરદાર ધડાકો થયો. આખી હોસ્પિટલમાં અંધારું છવાઈ ગયું અને ફાયર એલાર્મ વાગવા લાગ્યા.
ધડાકાનો ફાયદો ઉઠાવીને ડૉ. સિદ્ધાર્થ અને ડૉ. અંજલિ સ્ટેમ સેલના કરોડો રૂપિયાના કન્ટેનર્સ અને બાકીના ભ્રૂણના સેમ્પલ એક બ્રીફકેસમાં ભરીને હોસ્પિટલના ધાબા (ટેરેસ) તરફ ભાગ્યા, જ્યાં માફિયાઓનું એક પ્રાઇવેટ હેલિકોપ્ટર તેમની રાહ જોઈ રહ્યું હતું. નવ્યા લોહીલુહાણ હાલતમાં, ખભા પર વાગેલા ઘાની પરવા કર્યા વગર તેમની પાછળ ધાબા તરફ દોડી. ધાબા પર ભારે પવન અને વરસાદની વચ્ચે હેલિકોપ્ટરની બ્લેડ્સ ફરી રહી હતી. ડૉક્ટરો હેલિકોપ્ટરમાં બેસવા જ જઈ રહ્યા હતા ત્યાં જ નવ્યાએ જોરથી બૂમ પાડી, "સ્ટોપ!"
રાઘવ હજુ જીવતો હતો. તે ચહેરા પર પ્લાસ્ટિકના બર્ન માર્ક્સ સાથે ધાબા પર ધસી આવ્યો અને નવ્યા પર તૂટી પડ્યો. વરસાદના પાણીથી લપસણા બનેલા ધાબા પર આખરી અને લોહિયાળ લડાઈ શરૂ થઈ. રાઘવે નવ્યાને પેટમાં જોરદાર મુક્કો માર્યો, નવ્યા ધાબાની કિનારી પર જઈને પડી. નીચે સાત માળ ઊંડી ખાઈ હતી. રાઘવ લોખંડનો સળિયો લઈને નવ્યાનો જીવ લેવા આગળ વધ્યો. બરાબર જ્યારે રાઘવે સળિયો હવામાં ઉગામ્યો, ત્યારે નવ્યાએ નીચેથી સરકીને રાઘવના પગ ફસાવી દીધા. રાઘવનું સંતુલન બગડ્યું અને નવ્યાએ પૂરી તાકાતથી તેને ધાબાની રેલિંગ બહાર ધક્કો મારી દીધો. રાઘવ સીધો સાતમા માળેથી નીચે પટકાયો અને તેનો અંત આવ્યો.
બીજી તરફ હેલિકોપ્ટર ટેક-ઓફ કરી ચૂક્યું હતું અને જમીનથી ૧૦ ફૂટ ઊંચે હતું. નવ્યાએ સમય ગુમાવ્યા વિના ધાબા પર પડેલી રાઘવની સ્નાઈપર રાઈફલ ઉઠાવી. તેણે વરસાદની વચ્ચે આંખ ઝીણી કરીને હેલિકોપ્ટરના પાછળના ટેઈલ-રોટર (પંખા) પર નિશાન સાધ્યું અને બે ગોળીઓ છોડી. ગોળીઓ સીધી હેલિકોપ્ટરના રોટરમાં વાગી અને તેમાંથી તણખા નીકળવા લાગ્યા. હેલિકોપ્ટર હવામાં ગોળ-ગોળ ફરવા લાગ્યું અને ધાબા પર જ ક્રેશ થઈ ગયું. નવ્યાએ દોડીને હેલિકોપ્ટરનો દરવાજો તોડ્યો અને ઘાયલ થયેલા ડૉ. સિદ્ધાર્થ અને ડૉ. અંજલિના હાથમાં કડકડાતી હથકડી પહેરાવી દીધી.
બરાબર એ જ સમયે હોસ્પિટલના દરવાજા તોડીને સીબીઆઈ અને સ્વાત (SWAT) કમાન્ડોની ટીમ અંદર ઘૂસી ગઈ. લેબમાં ફસાયેલી અન્ય ગર્ભવતી મહિલાઓ અને સેંકડો માસૂમ ભ્રૂણોને સુરક્ષિત બચાવી લેવામાં આવ્યા.
બીજા દિવસે સવારે, જ્યારે આકાશમાં સૂર્યોદય થઈ રહ્યો હતો, ત્યારે નવ્યા હોસ્પિટલની બહાર આવી. તેના ચહેરા પર થાક અને લોહીના ડાઘ હતા, પણ આંખોમાં સેંકડો માસૂમ જીવ બચાવવાનો અને આંતરરાષ્ટ્રીય મેડિકલ માફિયાનો નાશ કરવાનો ગર્વ હતો.
