દાસ્તાને ની.ભૂ. (ની.ભૂ. એક સંઘર્ષશીલ એંજીનિયર)
આશા નું કોઈ કિરણ બચ્યું ન હતું , નિરાશા-નિરાશા અને નિરાશા નો જ માહોલ ચારે બાજુ છવાયેલો હતો . ચાર વરસ પહેલાં ની.ભુ. એ એંજીન્યરિંગ પાસ કરેલું હતું . એક વરસ ડીગ્રી નો ભાર લઈ આમ-તેમ આટા ફેરા કર્યા હતા .નોકરી ક્યાય મળતી ન હતી પરંતુ આમ થી તેમ, તેમ થી આમ નોકરી માટે આટા ફેરાથી ની.ભુ. શારીરિક રીતે ખુબજ ફિટ થઈ ગયેલ હતો ! પરંતુ નોકરી નું કરવું શું ? ઘરના વડીલે સલાહ આપી કે જો ની.ભુ. તારી આવક અત્યારે ન થાય તો પણ આપણું જિવનનિર્વાહ અટકે તેમ નથી એટલે તું તારે આગળ ભણવું હોય તો ભણી શકે છે ! આથી ની.ભુ. એ માસ્ટર ડિગ્રી લેવાનું નક્કી કર્યું હતું ! બે વરસ માટે માસ્ટર ડિગ્રી માં એડમીશન લીધું હતું . બે વરસ ખુબજ ફિટ રહીને , સખત મહેનત કરીને ની.ભુ. એ માસ્ટર પાસ કર્યું હતું !
કુટુંબ માં ખુશી નો માહોલ છવાય ગયો હતો ,પરંતુ ની.ભુ. ની અંદર ગમ નો માહોલ હતો ! કારણકે વળી પાછી નોકરી મેળવવા દોડા -દોડી કરવાની હતી ! વળી પાછું ભૂતકાળનું પુનરાવર્તન ! ની.ભુ. શારીરિક રીતે ફીટ પરંતુ માનસિક રીતે ફેઈલ ! પાછી એક વરસ હડિયાહડી કરી નોકરી માટે ! પરંતુ ક્યાય પણ ની.ભૂ. નો મેળ ન ખાધો ! કંપનીઓવાળા અનુભવી ઉમેદવારો માંગતા હતા , ની.ભૂ. ને ફક્ત દોડા-દોડી નો અનુભવ હતો ,ફિલ્ડ નો શૂન્ય ! આથી ની.ભૂ. સતત રિજેક્ટ થતો હતો , નિરાશાનો માહોલ હતો ત્યાં પાછું આશા નું કિરણ દેખાયું ! ઘરના વડીલ શ્રી , પિતા શ્રી, શેઠ શ્રી ભૂલકામલે કહ્યું ,જો નીત્ય નવીનમલ ! આપણે રોટલા ની કોઇ ચિંતા છે નહીં ! આથી તું એ વિચારવાનું છોડી દે અને મહેનત કર્યા કર જરૂરથી કોઇ સારા વાના થશે ! ખુબજ મહેનત ના અંતે પણ નિષ્ફળતા મળતા ની.ભૂ. ને માનસિક અનફિટતા ની સાથો- સાથ હવે શારીરિક અનફિટતા દેખાવા લાગી હતી ! વળી પાછું આશા નું કિરણ પ્રગટ્યુ ! કોઇ એ પકોડાની લારી કરવાનું ની.ભૂ. ને સુચવ્યું ! ની.ભૂ. ની અંદર વિચારોનું વાવાજોડું સર્જાયુ ! અંતે વાવાજોડું શાંત થતાં ની.ભૂ. એ મન મનાવ્યું અને લારી ભાડે લઈને પકોડા નો બિઝનેસ શરૂ કર્યો !
ની.ભૂ. ને લાગ્યું કે હવે વાંધો નહીં આવે, નશીબ આડેથી પાંદડુ ખસી ગયું છે ! 500 ગ્રામ , 1 કિલો , 2 કિલો ,5 કિલો પકોડા ના ઓર્ડર ઉપર ઓર્ડર આવવા લાગ્યા . ની.ભૂ. નો સિતારો બુલંદી ઉપર બેઠો ! હજુ તો માંડ એકાદ વરસ સિતારો ચમક્યો હશે ત્યાં તો ફિટનેસ ની હવા શરૂ થઇ ! પકોડા ખાય ને અદોદરા થયેલા ગ્રાહકો ફિટનેસ તરફ જૂકવા લાગ્યા ! સવારે 4 વાગ્યે ઉઠીને ની.ભૂ. 50 કિલો પકોડા નું મટીરીયલ બનાવતો અને સવારે 10 વાગ્યે ચપો-ચપ બધા પકોડા ઉપડી જતાં હતા ! પાછો પવન ફરતા, અદોદરા ગ્રાહકો ફિટનેસ તરફ વળતાં, 2 કિલો પકોડા વેચવા ની.ભૂ. માટે આકરા થઇ પડ્યા !
પાછો ની.ભૂ. ના જીવન માં નિરાશા નો દોર શરૂ થયો ! વળી પાછું આશા નું કિરણ દેખાયું ! કોઈ એ સલાહ આપી કે ની.ભૂ. ફિટનેસ ના વર્ગો ચાલુ કર એમાં સારું છે !
અત્યારે ની.ભૂ. પકોડાની લારી બંધ કરીને ફિટનેસ ના વર્ગો ચલાવી રહયો છે ! કારણ કે ની.ભૂ. પાસે મોટો કસ્ટમર બેઝ છે, પેલા પકોડા ખાવા વાળા જ ની.ભૂ. ના ફિટનેસ ના વર્ગો માં આવે છે , ‘ફીટ’ થવા !!!
બહુ સરસ ચાલે છે ની.ભૂ. ના ફિટનેસ ના વર્ગો ! પરંતુ , ની.ભૂ. ને બીક છે કે પાછો દોર બદલાશે તો ? તો હું શું કરીશ ? આવા વિચારો ને વિચારો માં ની.ભૂ. ને હમણાં ‘દિલ નો દોર’ પડ્યો છે ! એટલે કે ‘દિલ કા દોરા પડા હે’ ! પેલા હિન્દી ફિલ્મ નો ‘પ્રખ્યાત ડાયલોગ’ ની.ભૂ. ના જીવનમાં વાસ્તવિકતા નું રૂપ લઈને આવ્યો છે ! આપ સૌને વિનંતી છે કે કોઇ નવો આઇડીયા (જે પાછો ફરીથી બદલાય ન જાય, દોર બદલાય ન જાય તેવો ! ) આપની પાસે હોય તો તુરત જ મોકલી આપશો જેથી કરીને ની.ભૂ. પહેલા જેવુ જ સ્વસ્થ જીવન જીવી શકે , નિરાશા વગર નું આશા સાથે , એક દમ મસ્ત , હિટ તથા એક દમ ફીટ !!!
લિ. બિપિન આઇ ભોજાણી (ચમકાવો ૩૨ સ્ટાર્સ ના લેખક)
