થોડી વાર છે..
ધોમ તપતા આ સૂરજને ક્ષિતિજે ધરા સાથે મિલનની થોડી વાર છે,
ગુલાબ સમી એ સંધ્યાને પણ ચોમેરથી ખીલવાની થોડી વાર છે.
ભલેને ખીલ્યા પુષ્પો, વિના મધુકર પીમળને પ્રસરવાની થોડી વાર છે,
શરમાતા એ ગુલાબને કહો, પ્રેયસીના ગાલે સ્પર્શવાની થોડી વાર છે.
આંખોથી વરસાવી લ્યો પાણી, ધરાને ભીંજવવા વર્ષાની થોડી વાર છે,
લાગણીઓ છુપાવી દો છાની, હમરાઝના પગરવની થોડી વાર છે.
કઠણ છે થોડો મારો લહેજો, તાસીર બદલવાની થોડી વાર છે,
તમે કહો તો વદી દઉં વાણી, સંતોને આવવાને થોડી વાર છે.
ચણાવી લ્યો અહીં મકાન, બસ ઘર બનવાની થોડી વાર છે,
સ્વજનો તો રેહવા આવી ગયા છે, ગૃહલક્ષ્મીને થોડી વાર છે
કરી લઉં અંતરમાં યુદ્ધ, રણમેદાનમાં ઉતરવાને થોડી વાર છે,
સામે દુશ્મનો ઊભા છે, સગા સંબંધીઓને થોડી વાર છે.
તું ક્યાં ભાગે છે જીવ.? ઊભો રે.! શમણાંને ઉગવાને થોડી વાર છે,
"બેનામ" અડધી રાત ગુજરી છે, પ્રભાત થવાને થોડી વાર છે.
