હીરની દોરી સોહે માતા જ઼શાેદા ઝુલાવે જો.
કામણગારા કાનને મીઠી નીંદરમાં પોઢાડે જો.
સુઈ જા કાના સુઈ જા,
તારી નીંદર ના નજરાયે રે.
મોરલી તારી મીઠી તારા અધરને સોહાવે રે.
મોરપિંછ,પિતાંબર તારા અંગને ઓપાવે રે.
સુઈ જા કાના સુઈ જા ,
તારી નીંદર ના નજરાયે રે.
વનના પંખી પોઢ્યા,ગોરી ગાવલડી હરખાવે રે.
વ્હાલપની સરવાણી માતા ઉરથી જોને ગાવે રે.
સુઈ જા કાના સુઈ જા,
તારી નીંદર ના નજરાયે રે.
હીરની દોરી સોહે માતા જ઼સોદા ઝુલાવે જો.
કામણગારા કાનને મીઠી નીંદરમાં પોઢાડે જો....
માતા કૌશલ્યાના બાળ,
માતા સુમિત્રાના લાલ,
માતા કૈકેયીના ઉરહાર,
તમને પારણીયે ઝુલાવું.
સંગે પોઢે લક્ષ્મણ બાળ,
સંગે પોઢે ભરત બાળ,
શત્રુધ્ન વીરનો સંગાથ ,
તમને પારણીયે ઝુલાવું.
આભે તારલાં ગાતા ગીત,
ચંદ્ર સરીખા જેના મીત,
કેવો વાયરો વાતો શીત,
તમને પારણીયે ઝુલાવું.
અરે કરશો ન કોઈ શોર,
પોઢે મારા મનનાં મોર,
જોજો જલ્દી થાશે ભોર,
તમને પારણીયે ઝુલાવું.
હેતે હાલરડા સૌ ગાય,
નિંદરે પોઢે ચારે ભાઈ,
માતા આનંદે હરખાઈ,
તમને પારણીયે ઝુલાવું.
-ડૉ.સરિતા (જલધિ)
કાનાનું હાલરડું - 2
હિંડોળો ઝૂલે ને મોહન પોઢોરે નીંદરમાં,
રાધિકા રાણીના ભરી સોણલા ભીતરમાં.
મોહન મારા પોઢો રે નીંદરમાં..
ગોપીના વલ્લભનું હું ગાઉં રે હાલરડું,
વાંસળીના સૂરે ધન્ય ધન્ય થાઉં રે.
મોહન મારા પોઢો રે નીંદરમાં..
કદંબની ડાળે ઝુલે વિંઝણો રે નાખતી,
જમુનાના નીર સૂર રેલાવે રે.
મોહન મારા પોઢો રે નીંદરમાં..
માતા રે જશોદા તમને હેતેરે ઝુલાવે,
દેવકીજી જોને મંગળ ગાયે રે.
મોહન મારા પોઢો રે નીંદરમાં..
-ડૉ.સરિતા (જલધિ)
રાધાનું હાલરડું - 1
રાધારાણી હરખે પોઢે રે નીંદરમાં,
સોણલા સોનેરી તું તો લાવને.
પવન તું તો વિંઝણલાે નાખને.
મોરલાં, પોપટ ,મોર શોભતા પારણિયે,
ઘુઘરો રૂડો તું ખમકાવ રે.
બાંધવ બેનને હેતે ઝુલાવને.
વનની વાદલડી તું વરસી રે જાજે,
ફોરાની ફોરમ તું રેલાવ રે.
ધરતીના રવને થંભાવી જાજે.
રાતનાં તારલિયા ટમટમી જાને,
ચાંદનીનું નૂર તું રેલાવ રે.
નયને મીઠા સોણલા તું લાવ રે.
-ડૉ.સરિતા (જલધિ)
રાધાનું હાલરડું - 2
નિંદરે ઘેરાણી રાધા રાણીને ,
માતા મીસરી રે ઘોળે સોણલાની.
અંધારાના રાજા ચાંદા તપ ધરી રહેજે,
મારીમીઠડી પરીની તું આડશ કરી દેજે.
તારાને મળેતો એ જ સંદેશો તું કહેજે.
નિંદરે.......(૧)
તારે રે પારણીયે આ મારો લાડ ખજાનો.
છે જગથી અનોખોને તોયે સૌથી મજાનો.
બૂંદ બૂંદ ભરી કર્યો છે એને મોટા ગજાનો.
નિંદરે.......(૨)
નિંદરે ઘેરાણી રાધા રાણીને ,
માતા મીસરી રે ઘોળે સોણલાની.
-ડૉ.સરિતા (જલધિ)
