અમે દીકરા અને દીકરી માં ફરક જ નથી રાખતા.. આવું કહેનારા ઓ પણ ક્યારેક દીકરીના "કેમ ?" નો જવાબ આપી શકતા નથી..
"કેમ... ?"
જો દીકરા ના જન્મ વખતે પેંડા વહેંચાય તો
તો દીકરી ના જન્મ વખતે સહાનુભૂતિ કેમ ?
જો દીકરાને મહેમાન સાથે મઝા કરવાની છૂટ અપાય
તો દીકરીને મહેમાન ના સ્વાગત કરવાની ફરજ કેમ ?
જો દીકરાને ઘરના કામ નહિ કરવાની સ્વતંત્રતા અપાય
તો દીકરીને ઘરનું કામ શીખવાડવાનો આગ્રહ કેમ ?
જો દીકરાના અભ્યાસ માટે લૉન લઇ શકાય
તો દીકરીની વિદાય માટે લૉન કેમ ?
જો દીકરો એના કોઈ ડરથી કકળાટ કરી શકે
તો દીકરી ના ડર ને ઓળખવાની અવગણના કેમ ?
જો દીકરો દસ વર્ષની ઉંમરમાં પણ પાંચ વર્ષના બાળક જેવું વર્તન કરી શકે
તો દીકરી માટે દસ વર્ષની ઉંમરમાં જ વીસ વર્ષ ની સ્ત્રીના જેવા વર્તનની અપેક્ષા કેમ ?
જો દીકરો મૂવી કે મોજશોખ પરમિશન વિના માણી શકતો હોય
તો દીકરી ના મોજશોખ માટે આટલા બધા નિયંત્રણ કેમ ?
જો દીકરો પોતાની નાપસંદગી જાહેરમાં વ્યક્ત કરી શકતો હોય
તો દીકરીની પસંદ ઉપર આટલા બધા માપ-તોલ કેમ ?
જો દીકરો પોતાનું કરિયર જાતે પસંદ કરી શકતો હોય
તો દીકરી માટે સૅઇફ કરિયર જોવાની વૃત્તિ કેમ ?
જો દીકરો કરિયરમાં અસફળ રહે તો નવી તક ખુલ્લી હોય
તો દીકરી ના કરિયર ને કોમ્પ્રોમાઇઝ કરવાનો દુરાગ્રહ કેમ ?
જો દીકરો ગર્લ-ફ્રેન્ડ બનાવે તો એને બેમિસાલ કળા ગણાય
તો દીકરી ના બોય-ફ્રેન્ડ ને લઈને અત્યંત ધમાલ કેમ ?
જો દીકરો પસંદગીના પાત્રને પરણી શકતો હોય
તો દીકરી ની પસંદ ની ભરપૂર તપાસ કેમ ?
જો દીકરો ઓફિસથી ઘેર આવીને સોફામાં લંબાવી શકતો હોય
તો દીકરી માટે ઓફિસ પછી પણ રસોડા નું કામ કેમ ?
જો દીકરો પોતાના પરિવારના કોઈ પણ સદસ્ય ને મન ફાવે ત્યારે મળી શકતો હોય
તો (પરણેલી) દીકરી ના સ્વજનો ને આમંત્રણ અને પ્રથા પ્રમાણે મળવાનો કાયદો કેમ ?
જો દીકરો શોર્ટ માં પણ ગમે ત્યાં ફરી શકતો હોય
તો દીકરીએ શું પહેરવું એ ચર્ચાનો વિષય કેમ ?
જો દીકરાના ઘઉવર્ણ ને સહજ સ્વીકારાતો હોય
તો દીકરીના રંગ ને નિખારવા નો નિયમ કેમ ?
જો દીકરાના બ્રૅક-અપ વખતે સહાનુભૂતિ નો વરસાદ થતો હોય
તો દીકરી નું બ્રેક-અપ નર્ચર વગરનું કેમ ?
જો દીકરો થઈને દીકરીની કમાયેલી દોલત બેઝિઝક સ્વીકારી શકતો હોય તો
તો દીકરીને રસોડામાં મળતા દીકરાના સપોર્ટને મદદ નું ઉપનામ કેમ ?
જો દીકરાનો બૉડી-શૅપ મૅટર ના કરતો હોય
તો દીકરી માટે પ્રસુતિ પછી પણ સુંદરતા જળવાઈ રહે એવી હઠ કેમ ?
જો દીકરો લગ્નના નામે દહેજ ના બદલામાં શરીર સુખનું બાર્ટર કરે
તો દેહ-વ્યાપાર કરતી સ્ત્રીઓ આટલી અપમાનિત કેમ ?
જો દીકરો માં-બાપને હડધૂત કરી નાંખે તોયે એ ચહીયાતો
તો દીકરીને માટે આટલા બધા કુરબાનીના કલાસ કેમ ?
જો દીકરા નો ગુસ્સો એનો સ્ટ્રેસ ગણાતો હોય
તો દીકરીના હોર્મોનલ બદલાવ આટલી હદે બેનામ કેમ ?
જો દીકરો મોડી રાત સુધી ઘરમાંથી બહાર રહી શકે
તો દીકરી ને દિવસે પણ એકલા નહિ જવાનું બંધન કેમ ?
જો દીકરાની અણઆવડત પછી પણ એના ઉપર આટલો બધો ભરોસો કરી શકાતો હોય
તો કાર્ય-કુશળ દીકરી ઉપર શંકા અને વધારે પડતો અવિશ્વાસ કેમ ?
જો દીકરાને દુઃખ પહોંચે અને વ્યાકુળ થઇ જવાતું હોય
તો સંસારમાં દીકરી ના જિંદગીભરના દુઃખને નસીબ નું નામ કેમ ?
જો દીકરા ના લગ્ન કરતી વખતે દીકરીને સાસરે જવાની પ્રથા હોય
તો દીકરી માટે માબાપ નું ઘર છોડવાની સજા એનો કરિયાવર કેમ ?
પત્નીના મૃત્યુ પછી દીકરો રંગીન જિંદગી માણી શકતો હોય
તો પતિના મોત પછી દીકરી માટે સફેદ સાડી કેમ ?
