2008 સપ્ટેમ્બર ના અંત માં મને વહેમ પડ્યો કે મારા શરીરમાં કઈક ગોટાળો થયો છે. પ્રથમ ટેસ્ટ માં બ્રેસ્ટ કેન્સર નો રિપોર્ટ આવ્યો. ડોકટરે કહ્યુ ત્યારે સંજોગવશ હુ એકલી જ હતી. સાંજે બધાં કામથી ઘરે આવ્યા એટલે વાત કરી. ઘરમાં થોડુ ચિંતા નુ વાતાવરણ ઉભું થયું પણ હજી બીજા ટેસ્ટ થાય પછી ખબર પડે, એમ મેં આશ્વાસન આપ્યું સહુને. મને તો પહેલા જ શંકા હતી એટલે જ ટેસ્ટ કરાવ્યા હતા. સિવિલ હોસ્પિટલમાં બધા ટેસ્ટ પછી બાયોપ્સી કરાવવા સ્ટેચર પર સુવાવડવામા આવી. ભારે ઉતાવળીયા હો...! પેસન્ટને એનેસ્થેસીયાની અસર થઈ કે નહિ તે જોયા વગર ચીરો…. ભલેને પેસન્ટ બુમો પાડે. મને લાગે છે પેસન્ટ ની બુમો ના સંગીતમય અવાજથી એમને કામ કરવાની મજા આવતી હશે..!