‘મુંબઈના બાંદરા ઉપનગરની એક રેસ્ટોરાંમાં પાંચ યુવાનો ગપ્પાં મારી રહ્યા હતા. દેખાવ પરથી બધા કોલેજિયન જેવા લાગી રહ્યા હતા. રેસ્ટોરાંમાંથી બહાર નીકળીને એ બધા બહાર પાર્ક થયેલી મારુતિ કારમાં ગોઠવાયા. પાછળની સીટમાં બેઠેલા ત્રણ યુવાનોમાંથી એક યુવાને ખિસ્સામાંથી એક નકશો કાઢ્યો. એ નકશો ફિલ્મ પ્રોડ્યુસર સુભાષ ઘાઈના ઘરનું ચોક્કસ લોકેશન બતાવતો હતો. ‘ગયા કામ સે સાલા’ એ યુવાને કાતિલ ઠંડકથી કહ્યું. એના બીજા સાથીદારો પણ હસ્યા. અબુ સાલેમે સુભાષ ઘાઈની ‘ગેમ’ કરી નાખવાનો ઓર્ડર એમને આપ્યો હતો. એ બધા અબુ સાલેમના શૂટર્સ હતા.