મુંબઈ પોલીસની ટીમે લોખંડવાલા કોમ્પલેકસની ‘ગાર્ડન વ્યૂ’ સોસાયટીના ફલેટનો દરવાજો તોડ્યો એ સાથે અંદરથી ગોળી છૂટવાનો અવાજ આવ્યો એટલે પોલીસ અધિકારીઓ એકદમ એલર્ટ થઈ ગયા. ફ્લેટના ડ્રોઈંગરૂમમાં અંધારું હતું. હાથમાં ટોર્ચ અને રિવોલ્વર સાથે પોલીસ અધિકારીઓ ફ્લેટના ડ્રોઈંગ રૂમમાં પ્રવેશ્યા. એમણે સાવચેતીપૂર્વક તપાસ આદરી. ‘ગાર્ડન વ્યુ’ સોસાયટીનો એ ફ્લેટ બે બેડરૂમનો હતો. લિવિંગ રૂમ, કિચન અને એક બેડરૂમમાં પોલીસે તપાસ કરી પણ કંઈ દેખાયું નહીં, બીજા બેડરૂમનો દરવાજો બંધ હતો. પોલીસે દરવાજો ઠપકારીને અંદર જે હોય એને બહાર આવવા આદેશ આપ્યો પણ અંદરથી કોઈ રિસ્પોન્સ મળ્યો નહીં. છેવટે પોલીસ ટીમે એ દરવાજો પણ તોડી નાખ્યો. એ બેડરૂમમાં પણ અંધારું હતું.