મિશન વેગા માનવજાતિ વર્ષોથી એલિયન્સની તલાશ કરી રહી હતી. સર્ચ ફોર એક્સ્ટ્રાટેરસ્ટ્રીયલ ઇન્ટેલિજન્સ (સેટી) જેવા અભિયાન દ્વારા પણ બુદ્ધિશાળી એલિયન્સની તલાશ જારી હતી પરંતુ હજી સુધી એમનો કોઇ પત્તો લાગ્યો ન હતો. એલિયન્સ સુર્યમંડળમાં દેખાયાના બિનસત્તાવાર સમાચારો ઘણીવાર આવી જતાં પણ સત્તાવાર રીતે એલિયન્સ હજી સુધી મળ્યાં ન હતાં. પૃથ્વીવાસીઓ હવે મંગળવાસીઓ પણ બન્યાં હતાં. માણસોએ મંગળ પર વર્ષ ૨૦૩૦ થી કોલોનીઓ બનાવવાનું શરૂ કરેલું એ આજે વર્ષ ૨૦૭૦માં ધમધમી રહ્યું હતું. મંગળ પર માનવવસ્તીનો આંક થોડું થોડું કરતાં એક લાખને પાર થઇ ગયો હતો. આ વર્ષે એટલે કે વર્ષ ૨૦૭૦માં એલિયન્સના અસ્તિત્વ બાબતે એક મહત્વના સમાચાર મળ્યાં હતાં.